القائمة الرئيسية

الصفحات

اخر اخبار كوكب الصين

وداعا استغلال التجار واقوى خطة تسويق للسمان وبأقل تكلفة 30 جنية فقط




وداعا استغلال التجار واقوى خطة تسويق للسمان وبأقل تكلفة 30 جنية فقط 

ـــــــــــــــــــــــــــــــــــــــــــ
السلام عليكم ورحمة الله وبركاتة 
ــــــــــــــــــــــــــــ
ان شاء الله اخواني واحبابي الكرام سوف يتم وضع سلسلة افكار للتسويق  وبصورة حصرية و مستمرة على موقع كوكب الصين
كل الافكار ناتجة عن تجارب واثبتت نجاحها معي انا شخصيا وبالصور والادلة 

طبعا في البداية اللي جعلني الجأ للموضوع ده هو اني مريت بتجربة كل مبتدأ في مجال التربية وقابلتني نفس العقبة اللي بتقابل كل مربيين السمان بالاخص
لان السمان زي ما احنا كلنا عارفين بالرغم انه مربح وسهل في التربية  ونسبة الربح كبيرة لكن من اكبر عيوبه هي التسويق
مفيش مبتدا في المجال غير وقابلتة عقبة التسويق ومفيش مبتدأ في المجال غير انه وقع بين انياب استغلال التجار واللعب والتحكم بالاسعار 
وكل تاجر كان بيجبرك انك تبيع له بأقل سعر وفي النهاية بتوصل لحائط صد بيمنعك انك تكمل لان التجار بيتركوا  لك هامش ربح بسيط جدا
وفي بعض المربيين بيكونوا مجبرين يبيعوا القطيع للتاجر بأي سعر حتي لا تزيد نسبة الخسارة معهم 


انا واحد من الناس  مريت فعلا بنفس التجربة في بداية عملي وللاسف عشان تقدر تكسب من قطيع السمان عندك لازم يتم بيع كل القطيع قبل ال 40 يوم 
ولو مر 40 يوم على القطيع هتجد نفسك بتصرف في العلف ومهما زاد وزنة هتتربط بسعر معين وحد ادنى مش هتزيد عنه في البيع وبكدة هتلاقي نفسك بدأت تخسر
وبتكون بين نارين اما تبيع للتاجر بأقل سعر او تكمل في سكة الخسارة لان السمان بيتباع بالارقام مش بالوزن زي باقي الطيور 

عشان كدة احبابي الكرام بطرح لكم اول فكرة للتسويق واسهل فكرة وانت في مكانك واقوى خطة تسويق للسمان وبأقل تكلفة 30 جنية فقط 
لازم في البداية نعرف ان اي شيء في الوجود ربنا خلقة او الانسان صنعه في الجهة المقابلة في شخص تاني بيبحث عن الشيء ده 
مفيش شيء ملوش حد بيبحث عنه ومفيش منتج ملوش زبون حتى لو كان تراب 

السمان له زباين كتيرة جدا واكبر دليل انه له زباين هو وجود التاجر او الوسيط بين المربي والزبون وطالما موجود التاجر اللي بيستغلك يبقى في هناك زبون تاني بيدفع الضعف للتاجر عشان يلاقي السمان
لكن امكانياتك مقدرتش توصلك للزبون ده 

طيب نعمل اية عشان توصل للزبون ونقرب المسافة بينك كـ مربي وبين الزبون؟؟


سيادتك هتستغل التكنولوجيا الحديثة في البيع ودي اسرع واقوى فكرة 
الزبون هو انسان زيك بالظبط بيجلس على الانترنت وله صفحة فيس بوك وعشان نوصل له يبقى لازم نرسل له شغلنا قدامة ويشوف بعينه المنتج بتاعنا 

كل المطلوب من حضرتك كــ مربي انك في بداية استقبال الكتاكيت وبتربي القطيع قدامك 30 يوم للبيع 
ودي بتكون مدة جميلة وكافية نعمل خطة التسويق والانتشار 
اول حاجة هتعمل على الفيس بوك صفحة اعجابات مش صفحة شخصية  
لا صفحة عامة وتسميها بإسم جذاب زي مثلا طائر السلوى ... سمان الخير .. طائر السمان... وممكن كمان تسمي الصفحة بإسم محافظتك 
سمان البحيرة او سمان الاسكندرية سمان القاهرة واسماء من هذا القبيل 


صممنا الصفحة وكل شيء تمام والصفحة فاضية ومفيهاش ناس ولا متابعين طيب تعمل اية يا ابو جومانة بعد كدة ؟؟؟

هقولك ومتستعجلش وبلاش تزهئ من الموضوع وكتر الكلام لانه في مصلحتك ومصلحة شغلك 

يعني اتحمل شوية الرغي بتاع ابو جومانه 

سيادتك في الفترة دي هتنزل صور للسمان على الصفحة وتنزل فوائد السمان وفوائد بيض السمان وتظهر للناس فوائد الطائر الجميل ده 

لانه في ناس كتير جدا متعرفش عنه شيء بحكم انه ثقافة جديدة على المجتمع المصري يبقى انت هتخلي الصفحة عنوان للمنتج اللي هتعلن عنه الفترة الجاية 
مش هتخسر شيء في الموضوع ده غير ساعة كل يوم وانت قاعد على النت تنزل معلومات في الصفحة عن الطائر 

الايام مرت عليك والسمان عندك كبر وجاهز للبيع وفي نفس الوقت الصفحة بتعتك انت نزلت فيها كل المعلومات اللي تخص الطائر بتاعك 

كدة هنبدء بقى الشغل والاستهداف 


حضرتك هتقوم بعمل فيديو للسمان بتاعك ويكون فيديو نظيف وبتظهر شغلك بطريقة جميلة وركز على الموضوع ده لان الفيديو هيكون عنوانك 
فيديو مدتة ثلاث دقايق حد اقصى فقط 

وترفع الفيديو على صفحة الاعجابات مش الصفحة الشخصية وتعمل بوست كويس توضح فيه المنتج بتاعك ومكانك ورقم التيلفون 
تكتب اسعارك لو حابب وتقدر كمان لو متاح  عندك مكان للدبح والتنضيف انك تكسب اكتر من الموضوع وهو انك تعرض في البوست انك بتبيع اطباق مدبوحة ونضيفة وبالطلب 

طيب كدة عملنا كل شيء باقي اخر واهم خطوة وهي اعلان ممول للبوست 


ركز في الخطوة دي لانها مهمة جدا ومتوقف عليها انتشارك ونجاح خطة التسويق 

حضرتك هتروح اي فرع لفودافون كاش وتطلب منهم فيزا ب 30 جنية قولهم هستخدمها في الاعلانات 
لما توصل للفرع هياخدوا منك الخط بتاعك ويعملوا عليه الفيزا وهتاخد رقم مكون من 14 رقم 
طيب هعمل اية بال 14 رقم ده؟؟
هتدخل على صفحتك والبوست بتاعك اللي فية الفيديو وتعمل حاجة اسمها ترويج للمنشور 
زي الصورة دي كدة 
التسويق عن طريق الفيس بوك


طيب اخترنا ترويج نعمل اية تاني؟ 

الفيس هيدخلك على صفحة تانية اسمها صفحة اعدادات الاعلان
يعني قبل تنفيذ الاعلان الفيس هيقولك انت عايز الاعلان ده يوصل الى اصحابك على الفيس بوك ولا الناس المعجبة على بالصفحة بتعتك بتاعة السمان ولا انت عايز تستهدف ناس معينة ؟؟
طبعا انت بذكاء منك قوله لاء انا عايز استهدف الناس اللي في المنطقة بتعتي وساكنة قريب مني 
وده اسمة ( التسويق بالاستهداف ) 
بتختار اخر خيار وهو استهداف الاشخاص في منطقتك المحلية 
طبعا الفيس بعد ما انت بتختار الخيار ده هو ذكي بيروح ظاهر خريطة لمكانك وعنوان بيتك وبيقولك طيب انا هستهدف لك اشخاص على بعد 48 كيلوا متر مربع من مكانك 
يعني الموضوع بيكون زي دائرة مساحتها 48 كيلوا وانت نقطة المركز بتاعها 
48 كيلوا متر مربع كفيلة انها توصل اعلانك والسمان بتاعك  لاكتر من 10 الاف شخص 
تسويق بالاستهداف

بالله عليك اوعى تنام مني لاني تعبت في الموضوع والكتابة وخلاص هانت بس ركز معايا 

بعد ما تختار استهداف اشخاص في المنطقة هتنزل تحت شوية عشان تحدد مدة الاعلان وسعر الانفاق
في الصورة اللي تحت هتلاقي سهم رقم 1 ده خلي المدة 3 ايام 
وفي السهم رقم 2 الفيس بيقولك انك هتنفق 30 جنية على الاعلان لمدة ثلاث ايام 
حلو وجميل جدا 

وداعا استغلال التجار
في النهاية هتضغط دفع وهيقوم الفيس بدخولك علي طريقة الدفع فحضرتك هتختار الدفع عن طريق فيزا 
فيزا فودافون كاش اللي معاك مش هتكون ورقة دي هتكون رسالة على تيلفونك مكتوب فيها 14 رقم 
وهيكون مع الرسالة تاريخ صلاحية وتاريخ انتهاء وكمان رقم سري 
بينات الفيزا هتدخلها في المربع ده عشان يتم عملية الدفع 
دفع لتنفيذ الاعلان

بعد اتمام عملية الدفع الفيس هيقولك ان اعلانك تحت المراجعة وخلال فترة بسيطة سوف يتم بث الاعلان 
الفيس مش هيرفض الاعلان طالما اعلان مفيهوش اي شيء خارج او ضد سياسة الفيس بوك 
وخلال فترة بسيطة جدا هتلاقي رسالة من الفيس بوك بيقولك ان اعلانك تم الموافقة عليه 
بعدها هتلاقي الفيس بوك نفسة بيتابع معاك اعلانك وصل لكام شخص وهيقدم لك احصائية مستمرة لمدة ثلاث ايام 
سيادتك الفترة دي تكون متابع الاعلان عشان ان شاء الله هتلاقي زباين بتسأل وتستفسر ومش هتعرف تنام  من رن التيلفون 
والاسئلة والمقابلات وهتلاقي نفسك بتتنشر في المحيط بتاعك بطريقة فظيعة لكن كلة بيتوقف في النهاية على بعض الاشياء منهم
توفيق ربنا .. اول واهم شيء
صراحتك ووضوحك في الرد على الاسئلة بتاعة الزباين يعني لازم تكون لبق وبتجاوب بطريقة مهذبة 
في ستات بيوت هتطلب طلبيات فيا ريت بلاش كلام كتير معاهم وتتعامل بكل لباقة وادب واجابة على قد السؤال فقط 
لانهم هيطلبوا طلبيات توصل لهم للمنزل فلازم تقدم صورة كويسة ومحترمة انك عايز تاكل عيش فقط 
المنتج بتاعك لازم يكون على كفاءة عالية ومتوضب كويس لو مدبوح ومنتنضف وتدبح بالطلب لطلبيات الزباين عشان يكون طازة
وفي النهاية عشان بس توثيق لكلامي وللموضوع 
دي صورة لاخر قطيع وزعته بالطريقة دي والحمدلله اكثر من 7 الاف شخص تم الوصول له عن طريق الاستهداف خلال 3 ايام وب 30 جنية فقط 
وقدرت فضل الله اني اوزع كل القطيع بتاعي دبيح وصاحي لتجار ومحلات وزباين بيوت بفضل ربنا 

اثبات نجاح التسويق


زي ما انتوا شايفين معدل استهداف 7283 شخص
تفاعل وتعليقات اكثر من 1770 شخص 
وللتأكيد اكتر هتلاقوا كلمة ترويج مرة اخرى لانه بالفعل تم الترويج له بهذة الطريقة 
وبتمنى في النهاية يكون الموضوع افادكم او يكون سبب انكم تطلعوا من عباءة التجار واستغلالهم ليكم ومص دماء المتبدئين في تربية السمان 
واتمنى منكم الدعاء بالتوفيق ويا ريت تشيير للموضوع على صفحاتكم  بالفيس بوك عشان تعم الفائدة لكل الناس 
والى لقاء اخر في خطة جديدة اخرى من خطط التسويق للسمان وبأقل التكلفة 

ابو جومانة 
كوكب الصين

أقرأ ايضا


  1.    تقرير كامل عن دجاج براهما على كوكب الطيور والحيوانات 
  2.  ما هو الفرق بين تربية الطيور أرضي والتربية في بطاريات وأيهما أفضل
  3.  دراسة جدوى لمشروع سمان بياض -3000 جوز وصافي ربح 180 الف جنية سنوياً
  4.  ما هوعلاج إلتواء الرقبة في السمان
  5.  الارانب وانواعها وتركيبها الجسماني كل ما تريد معرفته عن الارنب
  6.  فوائد بيض السمان معجزة الخالق
  7.  علاج الارانب بالاعشاب - وداعا لضعف وموت الارانب من الان
  8.  ما هو جرب الارانب واسباب حدوثه وطرق العلاج والوقاية منه
  9.  ما هو الماعز القزم او الماعز القصير وما هي افضل السلالات منه
  10.  اسباب العقم المؤقت عند الارانب وقلة عدد الخلفة وطرق العلاج
  11.  علاج البرد عند الارانب وشرح اسلوب التهوية الصحيحة للحفاظ على الارنب
  12.  دراسة جدوى لتربية 1000 كتكوت سمان وبصافي ربح 3000 جنية
  13. ماهي دودة الميل ورم
  14. ما هي الطحالب وما هي استخدامات الطحالب المختلفة كعلف بديل
  15. تحصين طيور السمان من فيرس النيوكاسل العصبي
  16. طائر سمان البوب وايت الابيض اجمل طيور السمان- Bobwhite
  17. تربية السمان مع الحمام واستخدام الحمام لتفريخ بيض السمان
  18. افضل تركيبة طبيعية لبناء القناة الهضمية اثناء تربية كتاكيت السمان
  19. متى يبيض طائر السمان وطريقة تجهيز السمان لطرح البيض
  20. معرفة مواصفات السمان الابيض بيور -السلالة النقية
  21. خطة الامان قبل وبعد شراء الهامستر وذهابه الى المنزل
  22. سلسلة امراض الهامستر وطرق الوقاية والعلاج
  23. شرح انواع الهامستر ومواصفات كل نوع من انواع الهامستر
  24. الهامستر على كوكب الطيور والحيوانات
  25. تسمين البط بالطرق الصحيحة والحصول على اوزان مدهشة - تسمين حصري
  26. اسباب و علاج إلتواء الرقبة في البط
  27. تحصينات البط ومعلومات حقلية للمهندس عاطف عبد الدايم
  28. احترف تربية البط واحصل على اعلى معدل انتاج لطيور البط
  29. البط على كوكب الطيور والحيوانات وشرح حصري عن البط
  30. دراسه جدوى لتربيه وتسمين ٥٠٠ بطة بصافي ربح خرافي
  31. الوز على كوكب الطيور والحيوانات
  32. تعالى لتعرف حقيقة طيور البلشون على كوكب الطيور والحيوانات
  33. دراسة جدوى لتربية 100 كتكوت ابيض تربية منزلية وربح هائل




reaction:

تعليقات