حل نهائي للبق-أعرف ما هو

             

       

  

                     السلام عليكم ورحمة الله وبركاتة                

    

           احبابي الكرام اتمنى ان يكون الجميع بخير واتمني ايضا كل ما نقدمة من افكار  للتسويق  تساهم ولو بالقليل في حل عقبة  كل شاب مبتدئ يريد ان يعمل في مجال السمان                                                         

في المرة السابقة تكلمت عن فكرة تسويق السمان كانت بعنوان (  وداعا استغلال التجار واقوى خطة تسويق للسمان وبأقل تكلفة 30 جنية فقط )

واتمنى الاطلاع عليها لمعرفة كل خطط ووسائل التسويق لنجاح مشروعك وضمان الربح 

الفكرة الجديدة اللي هتكلم عنها انا بسميها خطة اليوم الواحد 

والفكرة دي كويسة جدا للناس اللي بتربي كميات بسيطة وقليلة او الناس اللي لسة بادئة في مشروع السمان وبتجرب انها تبني اسم في السوق

عشان كدة لو انت لسة جديد في المجال اهم شيء عدم المغامرة لان السمان عكس تربية الدواجن وباقي الطيور 

لو مفيش عندك خبرة في مجال تسويق السمان يبقى لازم البداية بكمية بسيطة وتزود الكمية كل مرة حسب حجمك وحجم اسمك في السوق

في كل دورة هتمر بيها هتكسب زبون وهيكون معاك اسمة ورقم تيلفونه  وهتبص تلاقي في النهاية معاك قائمة بـ اسماء لزباين بتكبر وانت بتكبر معاها 

 

طيب اية خطة اليوم الواحد اللي انت تقصدها ؟

خطة اليوم الواحد هي خطة السوق المحلي او سوق المدينة بتعتك 

مفيش محافظة من محافظات مصر مفيش فيها سوق اسبوعي وبعض المحافظات اسواق الطيور فيها بتكون يومين في الاسبوع 

يعني انا لو عملت خطة للبيع في اليوم ده ونفذتها كويس جدا ممكن فعلا انك تبيع اكتر من 500 سمانه 

هتقولي طيب انا عمري ما نزلت اسواق ولا وقفت فيها ولا بعرف اتعامل مع الناس واتكلم معاهم ؟ هعمل اية

اللي هقوله لك انه مفيش اسم بيتبني في السوق ببلاش او بدون جهد وتعب في البداية 

يعني انت هتتعب يوم في الاسبوع  لكن صدقني هترتاح جدا بعدين 

 

ايه السبب في كدة؟

السبب ان نزولك السوق مش نزول عشان تبيع الكمية اللي عندك فقط وتخلص مصلحتك وتمشي 

لا طبعا .لاني قولت في الاول في خطة عمل هيتم تنفيذها فلازم تسمعني للاخر  معلهش 

اليوم اللي صابح فية السوق من بليل حضرتك تتفق مع وسيلة مواصلة وليكن خطة العمل هتكون مقسمة على ثلاث اقفاص كبيرة زي بتاعة الفراخ

وزي المتواجدة في الصورة دي بالظبط 

خطة اليوم الواحد لبيع السمان

القفص ده بيشيل لحد 50 جوز سمان يعني 100 سمانة في ثلاث اقفاص يبقى 300 سمانة 
وممكن حضرتك تزود العدد حسب جدولك

في بقى بعض الامور اللي لازم يكون عندك علم بيها عشان تكسب من المشوار ده 

 

عمر السمان 

 

اول حاجة ان السمان بتاعك يكون عمره فوق ال 25 يوم وتحت ال30 يوم وفي الفترة دي وزن السمانة بيعمل من 175 جرام ل 200 جرام لو تحويله ضعيف كمان 

اية السبب من كدة ؟؟

السبب ان اغلب زباين السوق بيهتموا اوي بالسعر مش بالحجم والوزن ودي سياسة زبون السوق وهو انه بينزل السوق عشان يشتري اكتر حجات محتاجها وبأرخص سعر

سرعة البيع وضمان الربح

و هو انك تبدء فتح البيع بدري وتقدر انك تمسك سوق تاني وثالث وانت لسة السمان عندك مدخلش في مرجلة التعليف بالخسارة

تعويض الوزن 

طبعا اول اسبوع هتنزل تبيع فيه في السوق هيكون ارخص سعر نزلت بيه ولو نزلت سوق تاني هيكون السمان عندك مر عليه اسبوع وزاد وزنة عن ال200 جرام 

فتحاول انك ترفع على كل جوز واجد جنية لتعويض الاكل والوزن 

 

سعر البيع 

 

في اول يوم لنزول السوق زي ما اتفقنا هنبيع بأرخص سعر وانا بختار لك انك تنزل تحرق السوق وتقول السمانة ب 10 جنية 

كلمة السمانة ب 10 جنية لها اسلوب جذب عن ما تقول الجوز ب 20 جنية ودي في علم النفس بنسميها لفت انتباه لان الزبون اول ما يسمع السعر منك مش هيفاصل عشان اساسا مفيش طائر بيكون جاهز للدبح وب10 جنيةفقط

طيب هل لو انت بعت على 10 جنية السمانة في عمر 25 يوم هتكسب ؟؟ ايوة هتكسب وربحك هيكون اكتر من حوالي 4 جنية في السمانة الواحدة بعد مصاريفك كلها

طيب سؤال تاني هل هقدر ابيع كل الكمية اللي معايا في يوم واحد في السوق ؟؟ 

هقولك ايوة ان شاء الله  لاسباب كتير اوي 

اولا ان السوق مش هتلاقي فيه منافس لك زي باقي الطيور غير نادر جدا يعني لو لقيت حد في السوق قاعد بسمان هيكون واحد بس او اتنين فقط 

حسب ثقافة محافظتك وحتى لو لقيت منافس هتلاقيه بيبيع بنفس سعرك او اعلى منك يعني مش هيضربك في السعر 
ثانيا ولنفرض مثلا ان معدل عدد زوار السوق او زبائن السوق 500 فرد
ده لو السوق ضعيف انما في اسواق اعداد الزوار فيها بيوصل الااف
حضرتك كل اللي محتاجة من العدد ده كلة 
50 زبون فقط لو كل زبون هيشتري 6 سمانات ب60 جنية
انما في زباين اقل حاجة عشان تعمل اكلة هيشتروا من 10 الى 12 سمانة
وبكدة عدد الزباين اللي انت محتاجهم هيكونوا اقل من 30 زبون فقط

اسلوب السرعة في البيع
طيب نعمل اية عشان البيع يكون سريع ومنقعدش ساعتين في السوق؟
تستخدم اسلوب التغطية في السوق
بمعني ان اي سوق بيكون له مدخل ومخرج والمنطقة اللي في الوسط
في زباين كتير بتدخل من اخر السوق وفي زباين بتدخل من اوله 
وفي زباين بتلف في وسط السوق تبحث عن حاجة معينه
حضرتك لو مستعجل في البيع 
يبقى تمسك الثلاث مناطق 
تخلي فرد معاك يقف بكمية في اول السوق
وواحد تاني بكمية في اخر السوق
وحضرتك في نصف السوق 
وبكدة يبقى انت سيطرت على السوق كله 
ومفيش زبون محتاج سمان هيفلت من ايديك

سياسة الكلام
طبعا اللسان مع الزبون مهم جدا ولازم تتحمل اي مضايقات وترد على اي سؤال
لان في زباين كتير هتكون اول مرة تشتري سمان وتحب تسأل
لازم تخلي بالك طويل وتكون مرن في المعاملة 
الزبون اللي يشتري منك كمية ده اوعى تسيبه يشتري ويمشي
ده زبون لقطة بالنسبة لك وممكن يكون دائم
فلازم تاخد على الاقل رقم تيلفونه او تديله رقمك
عشان لو احتاج اي وقت تبعت له طلباتة بدون ما تنزل السوق
في زباين كتير جدا هتتعرف عليك وهتطلب رقم تيلفونك
وبكدة انت هتكون بعت الكمية اللي معاك وكمان طلعت بقائمة زبائن جديدة
لازم تقوم على السوق من بدري عشان تمسكة من اوله 
يعني من الساعة 6 الصبح تكون بتفطر وبتشرب الشاي في السوق

بالنسبة للارباح ومصاريف اليوم

اولا ده مش هيكون يوم وهيعتبر نصف يوم فقط 
لان اخر وقتك هيكون قبل صلاة الظهر وهتكون خلصت كل اللي معاك
حضرتك لو ربنا سهلها معاك وبعت ال300 سمانة 
هيعملوا معاك 3 الاف جنية 
السمانة في العمر ده هتكون صرفت عليك بالكتير اوي 8 حنية 
هيبقى انت طلعت بصافي ربح على الاقل ب 600 جنية في نص يوم
في مربيين شاطرين السمانة ممكن تقف عليهم ب6 جنية في العمر ده 
وفي اقل من كدة وكلة في النهاية زيادة في الربح
وفي وسيلة بديلة هي انك تشتري السمان من مزرعة في العمر ده 
وتنزل تنفذ خطة السوق وبردو هيطلع لك صافي ربح حلو جدا

وفي النهاية بتمني اني اكون قدمت فكرة ولو بسيطة 
وتحياتي للجميع بالتوفيق والنجاح 
وبلقمة عيش حلال