حل نهائي للبق-أعرف ما هو

تسمين الدجاج

اقوى تركيبة تغذية طبيعية وتحقيق اعلى معدل اوزان للدواجن-مهندس عاطف عبد الدايم

من افضل واجمل طرق التربية المضمونة والصحية هي نظم التربية للدواجن بالاستعانة بالعناصر الطبيعية وهناك مربيين يفضلون اسلوب التربية بهذة الانظمة للوصول الى معدلات اوزان مرضية وايضا لرفع الكفاءة المناعية للطيور واليوم سوف نطرح اقوى تركيبة طبيعية وتحقيق اعلى معدل اوزان للدواجن للمهندس عاطف عبد الدايم.

الموضوع دا لهواة الشغل البعيد عن الادوية والمضادات

خدها قاعدة

لو الرعاية بتاعة كويسة

لو وصلت فى عمر 7 ايام للوزن المطلوب لكل سلالة او اعلى قليلا تاكد انك هتعمل اعلى اوزان اخر الدورة لو ربنا حماك من مخاطر الدورة المرضية

ولاننا عارفين ان الطير مش بيكتمل تكوين القناة الهضمية بتاعتة قبل 4 الى 6 ايام من العمر

فاحنا عاوزين نسرع من تكوين القناة دى لان متوقف عليها الوزن

طبعا الكلام دا مناسب للكتكوت اللى جاى من مسافة طويلة بردة

او فقس واتاخر تحضينة

هنعمل خلطة لعنبر 10 الاف طير

معروف ان ال10 الاف هياكلو فى اول 24 ساعة 120 كيلو تقريبا لو الحرارة متجانسة 34 وتانى يوم هياكلو 148 كيلو لو كل الامور المتعلقة بالرعاية مظبوطة

وثالث يوم هياكلو 180 كيلو

وربع يوم هياكلو 205 كيلو

الخامس 235 ميلو

السادس 250 كيلو

السابع 268 كيلو

دا تقريبا متوسط الوزن لمعظم السلالات

احنا هنعمل كل يوم الخلطة دى على 2 كيس علف يعنى 100 كيلو

1 كيلو زبادى

نص كيلو خميرة

1 كيلو كركم

هيتم الخلط بالطريقة الاتية

هتجيب 2 كيلو علف وتخلط عليهم الزبادى خلط متجانس

وتجيب 1 كيلو علف وتخلط علية نص كيلو الخميرة خلط جيد

وتجيب 2 كيلو علف وتخلط الكركم عليهم

يعنى كل نوع لوحدة

هيكون الناتج عندك 7.5 كيلو

هتفرش اى فرشة على الارض علشان تخلط عليها

هتجيب 1 كيس علف تفردة على الكيس على ان يكون ارتفاعة عن الارض بعد الفرد تقريبا 8 الى 10 سم علشان تاخد اكبر قدر من المساحة

وتنشر نص الكمية بتاعة ال7.5 على الكيس الاول

وتفرد عليهم الكيس التانى بنفس الكيفية وتنشر علية ما تبقى من الخلطة

بكدا هيكون عندك طبقتين علف وطبقتين خلطة

ابدا اخلط خلط يدوى هات اللى فوت تحت واللى تحت فوق بطريقة دائرية بس هتخلط مسافة 10 سم من العلف المفروش بس علشان تعرف تتحكم فى الخلط ويكون متجانس ولما تخلط ال10 سم دول هاتهم عليك شوية او زيحهم بعد عن الكمية الاصلية

وهكذا الى ان يتم الخلط كاملا

هيكون اجمالى الخلطة 107.5 كيلو

دى هتنزلها وجبة كل يوم

وباقى اليوم علف عادى

طوال ال7 ايام الاولى

طيب فى المية هنعمل فقط الاتى

5 مل على اللتر عسل اسود

3 مل انزيمات بشرى اسمها نيودايجستين كانت بشترى العلبة ب 4 جنية

وهتضيف عليها مضاد سموم حمضى 2 مل على اللتر

اول 48 ساعة

وتانى 48 ساعة حط اسبيراميسين يكون شركة كويسة ليكون سوانوفيل او بلكوسبيرا لو الاول هتخلية 1 جرام على اللتر لو التانى هتخلية 2 جرام على اللتر

وباقى ال7 ايام فى المية نزل نيودايجستين فى المية مع العسل فقط

كدا خلصنا ال7 ايام الاولى من حياة الكتكوت علف ومية

واوزن بعد انتهاء اليوم السابع

علشان تعرف نتيجة شغلك اية

لو لقيت

الكوب لازم يكون على عمر 7 ايام 165 جرام

الهبرد 142 جرام

ايزا هبرد 155

افيان 162 ممكن يقل شوية الى 158 ويكون ناجح

الروس 162 الى 168 جرام

الاربور ايكرز يكون 138 جرام وممكن يقل الى 132 ويكون كويس

يبقى شغلك عادى يعنى ماشى مع الطبيعى

لاكن احنا عاوزينة اعلى من كدا

اهم شرط علشان اللىفات دا كلة يعمل افضل نتيجة

لان حرارة التحضين لا تقل عن 34 درجة اول 3 ايام وسيبك من كل الكلام النظرى بتاع نقص الحرارة كل يوم دا

هتكون اول 3 ايام

34 وباقى الاسبوع من 23 الى 33

لان اهم شرط من شروط تكوين جهاز هضمى جيد او بناء بطانتة (الخملات ) هى حرارة قصوى مش حرارة دنيا

الصورة الملحقة دى عبارة عن جزء من بطانة القناة الهضمية او ما يسمى الخملات اللى كل ما اكتمل نموها بسرعة وطولت زاد الوزن بتاع الطير

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم

المصدر

شاهد ايضا للمهندس عاطف عبد الدايم

1. مهندس عاطف عبد الدايم وفوائد تحميض المياة لتسمين الدواجن
2. مهندس عاطف عبد الدايم ومقاومة الفيروسات بالاعشاب-امراض الدواجن
3.  برامج المهندس عاطف عبد الدايم الخاصة بمكافحة مرض الIB للدواجن
4. جميع برامج الاضاءة  لطيور التسمين-مهندس عاطف عبد الدايم
5. برنامج تطهير وتعقيم لمزرعة موبؤءة - مهندس عاطف عبد الدايم 
6. العوامل الطبيعية والغير طبيعية  التى تؤدى الى زيادة استهلاك الطيور لمياة الشرب
7. علاقة الميكوبلازما ب فيرس النيوكاسل وفيرس ال IB  
8. عاطف عبد الدايم يكتب -ارفض دفعة الكتاكيت فورا اذا وجدت بها هذا المرض
9. مهندس عاطف عبد الدايم يكتب/ معلومة في كبسولة لمربي الدواجن
10.  فوائد الخميرة للحمام وطريقة تقديم الخميرة بصورة صحيحة للحمام
11. افضل انواع الكتاكيت البيضاء في السوق ومميزات وعيوب كل نوع
12.  دراسة جدوي مشروع تربية الدواجن 2022 | تربية 200 كتكوت