برامج المهندس عاطف عبد الدايم الخاصة بمكافحة مرض الIB للدواجن
نظرا لانتشار فيرس ال IB بشكل مخيف الايام دى
والناس عاوزة برنامج ثابت
وطبعا الرد الصحيح ان مفيش برنامج ثابت يعمل نتايج فى كل المناطق والبلدان
لان لازم معرفة نوع العترة اللى منتشرة فى المنطقة علشان تعرف نعمل برنامج يناسبها
تعالى من خلال ما كتبناة سابقا نجمع معلومات عن العترات بحيث يكون موضوع شبة مكتمل
معلش
البوست طويل شوية
لكنة مهم
ببدا على بركة الله
نظرة حقلية على مشكلة السنة دى
الاى بى
من ناحية تطور الاعراض فقط
يعنى رؤية واحد حقلى متبهدل فى المزراع
اول ما بيدخل المرض دا العنبر بيقلة قلة فى استهلاك المية ودا اول حاجة ممكن تلاحظها فى اول فترة الحضانة
بعد كدا بيعمل التهاب فى العين نفس الشكل بتاع الادينو فيروس بالظبط
واتساع فيها نفس شكل اتساع الميكوبلازما
وكل دا من غير نافق
طبعا كلامى دا على عنبر متاسس مناعيا صح
لان القطيع لو فية مشاكل ودخل المرض علية الدنيا بتتغير خالص
بعد كدا بيظهر حاجة كدا زى الزغطة زى ما يكون الفرخ واكل علف جاف وهو عطشان
فى المرحلة دى خلصنا فترة الحضانة وبدات الاعراض
وهنا بنلاحظ
تجمع عدد كبير من الطيور جانب الجدار وفية منها متكدس على بعضة حتى لو الحرارة كويسة
يليها مباشرا ارتفاع الاصوات التنفسية
يليها الشهقة او الجاسبنج
ومع الشهقة بيظهر عرض غريب جدا وهو الزغب اللى فى الراس بيقف بيكون عمودى على الراس نفسها مش بتاع الرقبة بتاع الراس بس
هنا بقى بيعلى النافق وارتفاعها على حسب ضراوة الفيرس او قويتة
فى المرحلة دى بينشط عدوى ثانوية مهما كنت مظبط قطيعك ومهما كنت عامل معاة لازم تظهر
85% من العدوى الثانوية بتكون ميكوبلازما
وممكن كولاى
وممكن سموم طبعا فى الحالة دى هيكون الطير فقد كل حاجة لو فية سموم
اما لو السكندرى فيرس هيكون القطيع راح فى خبر كان
واخر حاجة من الاعراض هى صعوبة فى التنفس نتيجة تجمعات التجبنات فى القصبة الهوائية والتفريعة بتاعتها
وفى الاخر بيحصل اختناق وبيموت
فية علامة مميزة جدا للنفوق بسبب المرض خاصة لو انت اشتغلت على السكندرى ونجحت فيها
هى ان الطير بيرفرف بعنف قبل ما يموت وبنلاقية ميت على ظهرة
اما لو مات وفى فى اول المنقار ناشرة يعنى السكندرى لسة موجودة
دى ملاحظاتى من 6 حالات اى بى شفتها فى اسبوع واحد
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
-------------------------------------------------------------------
هنستعرض هنا اسباب فشل لقاح ال IB
بنحصن كتير
وجربنا برامج كتيرة
فية منها اللى عمل اصابة خفيفة ومنها اللى عمل مشاكل ونافق على زى ما تكون محصنتش وفية من البرامج اللى لما اشتغلت بية وجالك الاصابة الحقلية معملتش معاك حاجة غير شوية اصوات تنفسية والتهاب فى العيون من غير خساير
طيب نعالى نلف شوية فى وسط مزراع بتصاب دايما بالمرض فى وطنا العربى ونعرف لية التحصينات بتفشل
اولا وزى ما كلة عارف اختلاف العترة اللى ماشية فى المنطقة عن عترة اللقاح ودا اساس الموضوع
تانيا طريقة استعمال اللقاح وان ناس كتير بتريح نفسها وبتحصن تحصين فى المية فى حين ان غالبية العترات المنتشرة تنفسية والفيروس متمركز فى اول الجهاز التنفسى وتحصينة المية على ما توصل للمناطق دى بتكون اقل قوة ودا سبب مهم جدا لفشل او ضعف غالبية التحصينات
ثالثا حضرتك قلت لا انا هقطر فى العين او ارش لانهم افضل من تحصينة المية وناسى ان فية غدة مناعية لة دور هام فى مناعة الاى بى اسمة غدة هاردريان موجودة فى العين
طيب لو حصل عندك اصابة ميكوبلازما او كوريزا او امونيا اعلى من 20 جزء فى المليون فالعين بتتاثر جدا وبالتالى الغدة دى مش بتشتغل بطاقها ومن هنا بياتى فشل اللقاح
رابعا حضرتك هتستعمل طريقة الرش خوفا من مستوى الامونيا فى الجو او اى ميكوبلازما تخليك مش عاوز تقطر فى العين ومش واخد بالك من حجم قطرة التحصين او ناسى ان الرطوبة النسبية بتاعة المزرعة والمنطقة ماثرة جدا على كفاءة الرش ورد الفعل للتحصين
خامسا حضرتك اخترت عترة مناسبة وطريقة تحصين متوافقة مع ظروف قطيعك لاكن ناسى مستوى السموم فى العلف وان اقل نسبة سواء من الافلاتوكسن او الاوكراتوكسين او الT2 توكسين بتقلل جدا من الاعضاء المناعية اللى انا معتمد عليها فى تكوين مناعات واجسام مناعية زى البيرسا والثيموس والطحال والكبد
فطول ما الاعضاء دول متاثرين باى مستوى من السموم فتاكد ان تحصينة غير كفئ سوا تحصينة اى بى او اى تحصينة تانية
سادسا موقع التحصينة من التحصينات الاخرى
يعنى بتحصن اى بى ومستقبلات التحصين مشغولة بفيرس اخر زى تحصينة النيوكاسل مع ان الاى بى اسرع واقوى من النسوكاسل فى استقبال المستقبلات لاكن لازم نحطها فى الاعتبار ونعرف ان لابد من مرور مدة لا تقل عن 12 الى 14 يوم بين التحصينات التنفسية وبعضها
سابعا ودى فى الامهات والبياض ان اى تحصينة حية مش هترجع انتاج البيض لطبيعية سواء نسبة الانتاج او شكل البيضة الا لو القطيع محقون لقاح زيتى او تحصينة ميت
فلازم مفيس برنامج امهات او بياض يخلو من تحصينة ميت اى بى
ثامنا واخيرا
للناس اللى بتشتغل شغل معملى ان حصرتك تحصن تحصينات ضعيفة والمناعية الامية عالية او متوسطة زى ال H120 وفى الحالة دى انت محصنتش لان صعب اختراق التحصينة دى لمستوى المناعة الامية
وبصرحة كل نقطةمن دول محتاجة بوست لوحدة لاكن حبينا ننبه عن حاجات مش بتيجى فى بال المشرف ويسئل نفسة لية تحصينة الاى بى بتفشل معايا
طبعا كل الاسباب اللى فاتت خاصة بالاى بى فى حين ان فية اسباب تداول اللقاح وفشلة اللى مشتركة فى كل التحصيات ودى تقريبا اتكلمنا عنها قبل كدا وكلكم عارفينها
مع تحياتى وشكرا
مهندس عاطف عبد الدايم
_________________
كمان
تكملة كلامنا عن مشكلة العصر
دى بعض المعلومات عن مرض الابى بى من احد الخبراء الالمان
**** مشكلة المرض الكبيرة بتكون فى حدوث طفرات فى ال SPIKE الموجود على سطح الفيرس
**** اهم ما يميز عترة 4/91 بتاعة الاى بى الاعراض العصبية
يعنى لو الاى بى المنتشر فى المنطقة بيجى باعراض عصبية يفضل تحصن العترة دى
**** لا يوجد برنامج تحصين ناجح يغطى كل مناطق العالم او حتى القطر الواحد
**** فية بعض المناعة التصالبية ببعض العترات بس مش كتير زى اى مرض اخر وذكر منها ان عترة الماساتشوسيتس بتحمى من ال M41
ولو حصنت H120 او H52 ممكن تحمى من عترات الماس كلها ومن الM41 ايضا
**** فى المانيا جميع طيور التسمين لابد من رشها فى المعمل يعنى شبة قانون لكل معمل
**** واهم معلومة طلعت بيها هى
ممنوع منعا باتا باتا باتا تحصين مزدوج نيوكاسل واى بى مع بعض كاول تحصينة
لاكن ممكن جدا تحصينهم فى البوستر او التحصينة التانية
**** مش بالضرورى ان الاجسام المناعية او المناعة الدموية عالية لعترة معينة انها تحمى نفس العترة خاصة لو دخلت موضعى يعنى دخلت من المجارى التنفسية
**** لو حصل عندك كمبرى امهات او بياض مشكلة فى القشرة بدون نافق رش اى بى
**** البداية بتحصينة قوية على الطير زى H52 تعتبر جريمة فى حق طير التسمين
منقول من احد الخبراء الاوربيين اللى بيزورا شركات الخليج
مع تحياتى وشكرا
مهندس عاطف عبد الدايم
----------------
وكمان
معلومة احنا عارفينها حتى من ايام الجامعة
ومقتنعين بيها جدا
وعندنا قناعة حتى الى الان
الا وهى ان لا يوجد مناعة تصالبية بين عترات الاى بى يعنى علشان ينحج اى تحصينة لازم يكون العترة المنتشرة فى منطقتك هى نفس العترة اللى محصن بيها
لاكن حضرنا ندوة لشركة فورت دودج وقالت كلام تانى غير ما كنا نعرفة
البوست دا مش علشان نقول كلامنا صح وكلامهم تجارى ولا انهم صح واحنا افكارنا قديمة
لا
علشان من باب الامانة نعرض على الاعضاء كل ما يقال علشان كل واحد يعرف الدنيا فيها اية
طبعا عندهم منتج اسمة برايمر ( تحصينة اى بى عترة متغايرة )
مكونة من الكلاسيكى h120
والعترة المغايرة d274
وبيقولو بالتحدى الحقلى هم اللى عملو ان اجتماع الشكل الكلاسيكى مع المغاير زى ما هو موجود فى منتجهم عمل مناعة تصالبية مع بعض العترات الاخرى
نحب نلقى نظرة عليها
بيقول بيعمل مناعة تصالبية مع عترة m41 ودى كانت مسببة خسايرة فى فترة من الفترات
وبيعمل مناعة مع 4/91 او D793 وطبعا دى مشهورة جدا اللى انترفيت عاملة منها تحصين مخصوص
وعاملة مناعة تصالبية مع عترة D1466 اللى دايما بتصيب مزراع البيض وبتقلل الانتاج
وعاملة مع عترة 020 الايطالية واللى مبهدلنا الدنيا فى جنوب اوربا
دا كلامهم
طبعا بالاضافة الى العترتين الاصليتين المكونين للتحصينة
وطبعا كلامهم ان تكوين مناعة تصالبية بيكون بتسب مش مناعة كاملة
انا بس حبيت اعطيكم وجة نظر
نتفق او نختلف معاها لاكنها موجودة
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
----------------
وايضا
بالنسبة للامهات خد الملحوظة دى
استكمالا لبوستات مرض العصر واللى بهدل الناس
الاى بى
واننا نحاول نغطى كل الفنيات الخاصة بية واللى تناسب كل المناطق
هنقول معلومة حقلية خاصة بمشرفين الامهات او البياض واللى بيحطو البرامج
الناس اللى بتحصن عترات مغايرة زى ال4/91 او برايمر او اى بى 88
وبتتبعة بلقاح ميت اى بى سواء الميت دا تبع حقنة الثنائى او الثلاثى او الرباعى او حتى ميت اى بى لوحدة
حاول بقدر المستطاع تبعد التوقيت بين تحصينة العترة المغايرة وبين الميت
لان معظم المحطات اللى حصنت التحصنايت قريبين من بعض وعملو اليزا
ب 4 اسابيع كان معدل الاليزا من 3000 الى 5000
اما لو تم التحصين بفترة زمنية كويسة بين المغاير وبين الميت
وصل الاليزا من 7000 الى 11000
ولذالك اخدناها كقانون ان يكون الفرق بين العترات المغايرة فى اى برنامج امهات وبين اللقاح الميت لمرض الاى بى لا تقل 50 الى 60 يوم
يعنى ناوى تحصن مغاير على عمر 12 اسبوع فلازم الميت يكون على عمر 20 اسبوع علشان تعمل افضل تتر مناعى
اللهم اجعل عملنا هذا خالص لوجك الكريم
مع تحياتى وشكرا
مهندس عاطف عبد الدايم
---------------------
وعلشان تعرف الدول بتعمل اية
فى احدى الدول المحترمة
قامت وزراة الزراعة قسم الطب البيطرى والانتاج الحيوانى
بعمل مسح شامل لمنطقة بالكامل لما المنطقة دى اتضربت اى بى
قام المختصين بعمل ميدانى لعزل العترة علشان يعلمو منها برنامج لقاحى غير عشوائى
كان البحث فى 36 مزرعة مصابة ب الاى بى
وكانت 48% من العينات عترة 4/91
و28% من العينات العترة الكلاسيكية Massachusetts
و24 عينة لم يتم التعرف على العترة
مع ان النفوق كان عالى جدا فيهم يعنى دى عترات عنيفة
ورجع الفريق البحثى
حط البرنامج التحصين لتحصينة عمر يوم بعترة H120
وعلى عمر 14 يوم بعترة 4/91
وكانت النتايح نحج البرنامج فى بعض المزارع وفشلة فى مزراع اخرى
كالعادة
لاكن نسبة نحاجة اعلى شوية من نسبة فشلة بعكش الشغل العشوائى اللى تم قبل البحث الميدانى دا
اللهم اجعل علمنا هذا خالص لوجهك الكريم
مع تحياتى وشكرا
مهندس عاطف عبد الدايم
-------------------
وكمان
فى
احدى الهيئات البحثية الحكومية فى دولة من الدول المحترمة المجاورة لمصر
ادت دورها ونزلت مزراع وعملت بحث ميدانى عن نوعية عترة ال IB
المنتشرة عندهم
واخذت مسحات Swabs من القصبة الهوائية والكلية
وجدوا ان من 150 عينة 112 اى بى
وال112 دول
60% منهم العترة الاسرائلى IS/885 لقرب البلد دى منها
و15% منهم العترة الايطالى الكلوية
و12% العترة الكلاسيك اللى يمشى معاها الh120 او الh52
10 % منهم العترة المغايرة 4/91 اللى بيصلح معاها تحصينة انترفيت
و7% منهم العترة المغايرة CR/88 اللى بيصلح معاها تحصينة ميريال
وبناء علية بدا الناس تحط برنامج تتناسب مع الوبائية
المقدمة دى بنقولها مش علشان البلد دى ولا وبائيتها
احنا بنقول اولا لازم الهئيات الحكومية المختصة تقوم بالدور دا
طبعا انا مش بكتب البوست دا للحكومة (( اللى استحالة تستجيب لحاجة))
انا بكتب للمربى
بعد ما قرات المنشور دا
وبعد ما اتصبت اكثر من مرة بالمرض
مجاش فى بالك انك تعتمد على نفسك وتاخد عينة سواء من مزرعتك او من مزرعة مصابة جنبك ترسلها لمعمل ثقة ( لازم ثقة دى ان فيها كلام كتير )
وتعرف اية نوعية الفيرس المنتشر فى منظقتك
وترحم نفسك من كم الخساير دا
هل اجراء زى دا هيتعبك او ياخد وقت او فلوس منك بالمقارنة باصابة حقلية بفيرس يخسرك كتير ويخلى مفيش دورة بتطلع سليمة ولا نسبة نافق زى زمان 4 الى 5%
طيب اية المانع انك تعمل كدا
على العموم
اعمل عينتك وانا منتظرك اعمل برنامج على حسب المعزلات دى بما يتناسب معك
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
--------------------------------------------------------
اما ما رائناة
من خلال المقابلات الحقلية لمشكلة العصر (IB )
لوحظ ان لكل عترة من عترات المرض شكل يميزها هنقول هنا ما نتذكرة
عترة 4/91
بيميزها جدا العرض العصبى اللى بيخلى الراس تلف دليل على حصول فيريميا فى الدم
وكمان سرعة سيطرة الفيرس على خليةالجسم وافرارز سمومة اللى بتوصل الى المخ تعمل العرض دا
عترة الماس Mass
دى تنفسية تامة ولا يوجد معها اى اعراض معوية ولا او اسهالات الى فى اخر مرحلة من مراحل المرض وغالبية الاصابة تتركز فى الجزء العلوى الجهاز التنفسى خاصة بعد فترة الحضانة مباشرة
وفى قمة المرض بيظهر سدة التفريعة المميزة للمرض
العترة QX
ودى اللى ضربت مصر والخليج السنة اللى فاتت وكانت اكثر حظا واكثر انتشار
ودى فى التسمين كانت بتتميز باسهال ابيض ظاهر على مؤخرة الطير والتهاب عالى جدا للكلى يقارب اصابة الكلى بالاوكراتوكسين
وبيكون فية حاجة غريبة جدا
مش كل النافق بتاعة بيسد التفريعة بتلاقى جزء مسدود واخر مصاب بالفيرس ومش سادد التفريعة
اما فى البياض فكانت الاعراض عجيبة جدا وكنا بنضحك عليها
عندك مثلا الفرخة يروح علشان تبيض ونجلس قدامها فترة وفى الاخر مفيش بيض بينزل بنسميها الفراخة المخادعة
فعلا فى حالات كتير بياض رصدت كانت بتعمل ايحاء بوضع البيض كاذب
والعرض التانى العجيب ان الفرخة تلاقيها جالسة على مؤخرتها زى جلسة الكلب او القطةبالظبط ودا بسبب ثقل المخؤخرة او الجزء السفلى من البطن جدا
وامتلاء الجسم من الداخل بالسوائل بطريقة كبيرة جدا
بفحص قناة البيض فى الطير المصاب تلاقية طولة من 7 الى 12 سم فى حن او طولها الطبيعى تصل الى 50 سم
دى بعض المشاهدات الحقلية اللى تم التاكد منها بالطرق المعملة
اللهم اجعل عملنا هذا خالص لوجهك الكريم
واسف جدا على الاطالة
مع تحياتى وشكرا
مهندس عاطف عبد الدايم
-----------------------------------------------------
دراسات ميدانية او حقلية مع بعض الاراء العلمية من الابحاث عن العترات الكلوية
لمرض الIB
لية هنستعرض العترات الكلوية بالذات
لان فيهم العترة الاسرائيلى المعزولة فى مصر وباقى دول الجوار والمسماة فى الاوساط العلمية بعترات الشرق الاوسط
العترات الكلوية المنتشرة هى
اباهم الذى علمهم السحر العترة الصينية الQX او بتسمى D388
دى عترة انتشرت فى مصر والخليج وبعض دول الشرق الاوسط وكانت عاملة خساير كتير
اعراضها معروفة لانها بتتركز فى الكلية وتلاقى غالبية الفراخ الاكبر حجما ملطصق بفتحة المجمع اسهال ابيض طباشيرى زى ما يكون الطير واكل علف بجرعة عالية من الاوكراتوكسين
الكلية ملتهبة جدا فصوصها طالعة لفوق جدا بها كل الاشكال المرضية
وفى البياض والامهات بتعمل شكل بيضة غير طبيعى مع انخفاض فى الانتاج
وتجمع للمية فى اكياس داخل التجويف البطنى
فية ايضا عترة الQ1
ودى عترة كلوية منتشرة فى امريكا الجنوبية واسيا واتعزلت فى بعض دول الشرق الاوسط زى مصر والسعودية كما قال عفيفى ومنال واخرون
فية ايضا العترة الاسترالى مش عارف اسمها العلمى بصراحة
فية العترة BR-I ودى العترة المغايرة البرازيلى
ودى كانت السبب فى نفوق عدد كبير جدا فى مزراع البرازيل وكانت السبب فى منع استيراد الفراخ من البرازيل من سنة 2010 الى 2012
واخبرا العترة الاسرائيلى IS1494 او ما تسمى ب Var2
ودى تقريبا من المسح والعزل اللى اتعمل فى مصر من عبد المنعم واخرون تمثل 55الى 60% من العينات الايجابية لمرضIB فى الدقهلية والبحيرة وبعض محافظات الدلتا
هى عترة كلوية من الدرجة الاولى
يعنى لما تفتح 10 طيور كتشريح تلاقى 3 بالكتير منهم فية السدة التنفسية اللى قافلة التفريعة او ما يسمى البليج اللى قافل الباى فوركيشن
لكن تقريبا 8 او 9 من الحالة فيهم اعراض كلوية
من احتقان فى الفصوص الكلوية الى امتلاء الحالبين باليوريك اسيد الى بعض حالات النقرص الموجود فى الجزء السفلى من الجهاز البولى
واشهر ما يميزها هى مية بيضا جيرية نازلة من المجمع وان اكبر احجام العنبر وخاصة الديوك عليها اسهال ابيض من ورا
وفية ايضا الاعراض التنفسية المعروفة لكن مش بنفس تكرار وانتشار الاعراض الكلوية
ومن تجربة حقلية
نزول دوكسى وكولستين فى حالة زى دى رفع النافق من 840 الى 2300 فى يوم واحد لعنبر 28 الف طير نظام مغلق
طيب هل فية مناعة تصالبية تعرف تحمينا من العترات دى وخاصة الاسرائيلى
هقولك
العلم بيقول
ان فية وسيلة واحدة فقط لرفع المناعة التصالبية
maximize cross-protection
وهى تحصين العترة الكلاسيك مع عترة مغايرة وخاصة المحتوية على 793B
ودول مثل ( CR88 - 4/91 )
الطريقة دى بترفع المناعة التصالبية للعترة الاسرائيلى
يعنى لما عملو ابحاث على كتكوت SPF وصلت المناعة من 82 الى 90% لما دمجو الكلاسيك مع اى من عترتى 793B
ولما دمجو الكلاسيك مع عترة D274 (الموجودة فى البرايمر مع انة اصلا محتوى على كلاسيك ) كانت الحماية وصلت 78 الى 81%
فى حين اما جربو نفس البرامج على كتكوت تجارى فى مزرعة
كانت النتايج اقل من كدا بس منزلتش عن 70%
يعنى بالبلدى كدا لو هيطلع عندك نافق 1000 فى اليوم مع استعمال برنامج من دول هيطلع 300 فقط وانت معتقد ان البرنامج لم يحمى لانك مش عارف من عير البرنامج النافق هيوصل كم
طيب فية ابحاث كتيرة جدا بتقول ان افضل برنامج هو عترة H120 مع عترة CR88 بس لما تحرينا عن الابحاث لقينا مصدرها جامعة او معهد علمى فى ليفربول والراجل المتبنى الكلام دا شغال فى ميريال يعنى كلامة يعتبر تجارى
دى بنقولها من باب الانصاف
فية بحث منشور فى جماعة بنى سويف ان الوبائية فى كفر الشيخ والمنوفية والغربية وشمال سينا
كان بيقول ان فية عترة اى بى مصرى اسمها EG 12120 ودى ايضا شبيهة بالعترة
ودى اعراضها تنفسية كلوية مع اسهال ابيض مخضر ظاهر جدا وهم بيقترحو برنامج عترة كلاسيك مع برايمر وبيقول اقرب برنامج للعترة المصرية
طيب على الجانب الاخر
وعلشان نقول اخر ما توصل لة الشركات
فشركة فيبرو Phibro منزلة تحصينة مخصوص للعترة الاسرائيلى
وبتقول مش محتاجة تجمع تحصينات وتعمل مناعة تصالبية ولا حاجة
وان الحماية عندهم وصلت 95الى 100%
واسم العترة او التحصينة TAbic® IB VAR 2
بنقولها من باب الانصاف واننا قولنا كل حاجة
نسيت اقول
ان العترة الاسرائيلى الكلوى اللى بنتكلم عليها
فى البياض والامهات بتعمل نفس الشكل بتاع الQX
من فرخة نصها الاخير ثقيل زى ما تكون عاوزة تبيض او ما يسمى البيض الكاذب
كمان مع التشريح هتلاقى التهابات مبيضية عالية جدا
احتقان منطقة الاستجما
وهتلاقى اكياس مائية على المبيض وعند الكلية وفى التجويف البطنى عبارة عن كيس ممكن صغير او وسط او كبير مليان مية
(( الية عمل الكيس دا ممكن نقولها فى بوست منفصل لمن يرغب ))
الايرانيين لهم راى مختلف فى الموضوع دا
بيقولو ان عترة IS1494 مش اسرائيلية فقط فيقولو فية منها ايرانى ومنها مصرى ومنها عراقى على حسب ترتيب الاحماص الامينية فى S1 geneالموجود على سطح الفيرس (( دا بروتين بيعرفو منة نوع الاى بى ))
الباحثين فى معهد بحوث الدقى قالو
ان IS1494 اتعزلت فى بورسعيد والقليوبية والدقهلية والبحيرة والجيزة من عام 2012 الى 2014 والباحثين هنا حاولو يعملو اكثر من برنامج معملى
على حد قولهم اعلى برنامج عمل حماية لا يتعدى ال55%
حتى دخلو التحصين الميت مع البرنامج ولم ياتى باى زيادة فى الحماية خاصة فى البياض والامهات والتسمين
وبصراحة لسة فية ابحاث كتير لم نستعرضها واراء علماء عرب واجانب
لكن البوست كدا هيطول جدا والناس بتمل
فخلينا فى بوست قادم نستعرض النوع التانى من العترات الاسرائيلية المنتشرة عندنا وفى بعض الدول العربية والمسمى IS/885 مع باقى العترات التنفسية
لو الناس بتحب النوع دا من البوستات
اسف على الاطالة وكان نفسى احط صور ومواقف حقلية بس الكلام هيكون كتير جدا
ملحوظة كل كلمة مذكورة فى البوست لها مراجع علمية باثتثناء بعض الشواهد الحقلية الخاصة بى من اعراض ودى كانت مدعمة بشغل معملى
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
---------------------------------------------------------------------
ملحوظة على السريع افتكرتها قبل ما اخرج
اضعف تحصينة IB اللى هى الH120 بتعمل تنكرز فى الخلايا البلازمية لغدة هاردريان
اللى فى العين لما بنقطرها فى العين
والخلايا دى هى المسؤالة عن الامينوجلوبيولين A اللى بيشتغل على تحصينة النيوكاسل
والتنكرز دا مؤقت
بيستمر من 7 الى 14 يوم كحد اقصى
معنى الكلام دا
ان مفيش اى تحصينة للنيوكاسل هتفيد لو كان قبلها او معاها تقطير اى بى عترة خفيفة
فما بالك بعترة شديدة او متغيرة فارينت استرين يعنى
التحصينات المحتوية على الفيروسين مع بعض الشركة المنتجة هى المسؤالة عن التفاعل دا لانهم بيقولو اننا مظبطين العيارية
يعنى اعتبر نفسك محصنتش نيوكاسل لو كنت مقطر اى بى اى نوع ودا لمدة من 7 الى 14 يوم
وعندى 6 ابحاث بتاكد كلامى
وهنحاول فى بوست منفصل نسلط الضوء على تفاعلات التحصينات مع بعضها واية اللى بيضعف التانى
والله على ما اقول شهيد
والله اعلى واعلم
مع تحياتى
مهندس عاطف عبد الدايم
-------------------------------------------------------------------------------------------
على ضمنتى الشخصية
وانا شخص متعود على امانة الكلمة
المنتشر فى مصر الان عبارة عن
العترتين الاسرائليين او الشرق اوسطية من الIB
IB IS/885 & IS/1494
ال IB موجودة بنسبة 70% للعترتين دول
يعنى لو حصنت بالتحصينات المتوفرة فى مصر فرصة نحاجك فقط هى 30%
وانفلونزا
بكل انواعها دى المعروفة سواء H9N2 & H5N1
وفية ايضا العترة اللى الناس هاجمونى لما قلت انها وصلت مصر
الا وهى H5N3 وكمان فية H5N2
والاخ الشرس H7 موجود ايضا
((مع احتمالية وجود H5N8 بس دا الكلام المنتشر الرسمى لكن لا اضمنة ))
اما الانفلونزا حتى لو حاقن ميت ل H9N2 & H5N1
فنسبة نحاج التحصينة 35% فقط
لان نسبة 65% من العترات الباقية مش بيتاثر بالتتحصينتين دول
دا اللى اتعمل بية مسحات الى الان ووصلنا من عينات
فما بالك باللى لم يطلة يد الباحثين
او لما يصلنا عيناتة حتى الان
وما بالك باللى لسة جاى فى الطريق بسبب عشوائية الصناعة
وعلى فكرة الحالات الشرسة بتكون فيروسين مع بعض
يعنى لنا الله طول الشتا دا
انا اسف انى كنت صريح معاكم
لكن لازم المكاشفة فى الامور دى
فهمت لية السما بتمطر فيروسات ؟؟؟؟؟؟؟
مصر اصبحت بيئة للفيرس اخصب من البيضة اللى بيعملو عليها اللقاح
مع تحياتى
مهندس عاطف
-------------------------------------------
البوست بتاعتنا اليوم علمى بحت
كلة كلام من ابحاث
وليس لنا اى تجربة فية
لكن انا نزلت 23 بوست خاص بمرض الالتهاب الشعب المعدى IB
وخلصنا كل الكلام علية
لكن حبينا نعرف الابحاث بتقول اية
او الناس بتحل مشكلتة ازاى خاصة الناس المشتركين معنا فى العترات زى الاتراك وجنوب اوربا وايران
انا عملت ملف اسمة معزولات الاى بى فى الشرق الاوسط وبعض دول اوربا الجنوبية ودول اسيوية
المهم
حصرنا تقريبا غالبية عترات الاى بى المنتشرة
8 ابحاث تركية
2 ايرانى
4 مصرى
1 ليبى
6 ايطالى
2 سعودى
3 مصرى الاصل منشورين فى مجلة خليجية
وبعض الابحاث الاخرى لدول عربية
المهم بنلاقى عترات الفيرس المنتشرة عندهم عبارة عن من 18 الى 23 عترات كلاسيك
والباقى عترات مغايرة او فارينت
بنسبة 60 الى 66% من العترات دى منتشر عترتين اسرائلى
هما
IS/885
والتانية
IS/1494
حتى الاتراك بيتهمونا اننا سبب فى انتشار العترات دى لذاك سموها عترات شرق اوسطية
يعنى لما تسمع عن عترات الشرق الاوسط فى اى مجلة علمية او اى محفل علمى تعرف انهم العترتين دول
وعلى فكرة العترتين منتشرين فى مصر من خلال ابحاث كتيرة من المسح الوبائى
واللى يقول غير كدا بيضحك على نفسة
يعنى اذا جالك اى بى تاكد انها بنسبة 60% عترة اسرائيلى
طيب من غير دخول فى تفاصيل كتيرة
اتعمل اكثر من 31 برنامج
لافضل برنامج للعترتين دول
لغالبية التحصينات المنتشرة سواء كلاسيك او فارينت
وطبعا صعب اقولكم على كل البرامج المهم
افضل برنامجين هم
تحصينة H120 مع CR88 على عمر يوم
وعلى عمر 14 يوم يكرر ال CR88
البرنامج دا عمل حماية 88% نافق
وعمل حماية اسمها اعراض السيليا (( برنامج بيقيسو بية كفاءة تحصينات الاى بى ))
وصل 94%
اى برنامج اخر عمل حماية من 20 الى 45 %
مهما كانت نوعة
الا برنامج واحد اعلى شوية وصل ل 66% يعنى اقل من البرنامج المقترح واعلى من باقى البرامج
هو تحصينة اتش120 عمر يوم
وCR88 عمر 14
يعنى مش مع بعض
لكن مع بعض كان افضل
ملحوظة البحث بتاع الفرق بين البرامج دا ملوش اى علاقة بالشركات المنتجة للقاحات
دا جاية من مجلات علمية
اشهرهم مجلة البيطرة الاوربية
ودا مش كلامى
دا كلام العلماء اللى جربو
حبيت احطة الكلام بين اديكم علشان نكون قلنا خبراتنا الحقلية فى البوستات اللى فاتت ونقول العلم بيقول اية
واخيرا هنقول
لازم خريطة وبائية لكل محافظة من محافظات البلد علشان لما تيجى تحط برنامج اى بى يكون ناحج معاك لان تحصين عترة مش موجودة بيعمل اجهاد على مدخل الجهاز التنفسى او السيليا ودا بيحمى الطير من المشاكل التنفسية واى تهتك فى جدارة بيعتبر فتح الباب للميكوبلازما طوال الدورة
وهنقول تانى
فية عترتين اسرائلى منتشرين فى مصر
وانك تقتصر فقط على تحصينة كلاسيك زى H120 صدقنى ولا اكنك عملت حاجة
وهنقول ثالث
ترك مزرعتك بدون امن حيويى خاصة ان اى طيور برية او حشرات او فيران او سيارات او انسان يتنقل بين مزرعتك ومزارع اخرى فتاكد ان المرض هينتشر سريعا فحاول تقفل مزرعتك على الزوار الغير مرغوب فيهم سواء زوار اادميين او لا امدميين
واخيرا
حاول تدخل الاعشاب التنفسية فى برنامجك الفترة الجاية لانها فترة اى بى
كتبنا 4 بوستات عن اعشاب تنفسية وخلطات حماية من الفيرس الابى بى
تدخل على جروب ملتقى مربى الدواجن فى العالم العربى ( م عاطف )
وهاتها من مربع البحث
المهم كن مستعد ولا تعتيد ان الشتا دا هيعدى بهدوء من ناحية الفيروسات وخاصة التنفسية
الصورة الملحقة دى للعترة الاسرائيلى
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
---------------------------------------------------------
شوفو يا جماعة انا من فترة مهتم بالمعزولات العترات بتاعة ال IB فى الشرق الاوسط
او فى منطقتنا العربية
تقريبا قريت ابحاث كتيرة جدا فى الشهر اللى فات دا
لكن اغرب ما فى الموضوع
هى العترات المعزولة حقليا فى مصر
والاخرى فى اسرائيل
انا مش عاوز اتكلم فى تفاصيل كتير
لان بصراحة يتكتب سلسلة من البوستات توصل لكتاب فى الموضوع دا
لكن هنقول حاجة غريبة جدا
هى التبادل بينا وبين اسرائيل حتى فى العترات بتاعة ال IB
يعنى مش الحكومة بس
لا كمان الIB مدلعنا
المهم
طبعا كل المهتمين بعترات الIB المنتشرة فى مصر
عارفين ان فية عترة اسرائيلى اسمها IS/1494
دى منتشرة عندنا من سنة 2010
والى الان مفيش عترة بتعمل مناعة تصالبية معاها ولا حتى بنسبة تقلل خساير الفيرس فى الحقل
كل الكلاسيك سواء الH120 Hاو M41 لا تتعدى الحماية 20%
طيب تعالى نروح للابحاث الاسرائيلية
ونجمع كمية منهم ونشوف عندهم اية
مش مهم عندنا انواع العترات
لكن تعالى نشوف نوعين فقط من العترات دى
عندهم عترة اسمها IS/885 دى كلوية وعترة تانية اسمها Beni-Seuf/01
ايوة الاسم كدا صح عترة من بنى سويف معزولة عندهم
طيب لغاية كدا عادى
المش عادى
ان العترة بتاعتهم اللى احنا عزلناها مش عارفين نتصرف معاها حتى الان
والعترة بتاعتنا اللى عندهم مستعملين العترة IS/885 عاملة حماية تصل الى 98% لصدها
وعندهم عترة اخرى عاملة مناعة تصالبية لعترة بنى سويف دى تصل الى 96% اسمها
Israel/720/9
يعنى من الاخر احنا زى الفل مع الكيان دا
بناخد منهم وبياخدو مننا حتى الفيروسات =D =D =D
بس هم بيتصرفو بسرعة حتى وصلت الحماية من عترتنا 98%
واحنا الحمد الله على نعمتة
وعلى فكرة عترة بنى سويف دى من سنة 2001
يعنى احنا من زمان والانواع بتقطع فينا ومفيش حلول حقلية على ارض الواقع
انا اسف على البوست
بس محبتش تتفقع مرارتى لوحدى
لازم مشاركة فى موضوع المرارة دا
لو اتكلمنا على الILT بينا وبينهم هتتعجبو جدا
او النيوكاسل
مع تحياتى وشكرا
مهندس عاطف عبد الدايم
-------------------------------------------------------------------------
السؤال دا اتسئلتة اكثر من 8 مرات فى الاسبوع دا من مشرفين محطات
غير عدد مش متذكرة على الفيس
جدوى حقن ميت اى بى فى التسمين
لان ظهر مدرسة بتقول ان حقن ميت اى بى ممكن تدخل فى برنامج التسمين
هنقول
ان حوالى 90% من اصابات ال IB المنتشرة مدخلها الجهاز التنفسى او الجزء العلوى من الجهاز التنفسى سواء الانف او العين ومنة الى القصبة الهوائية
يعنى مدخل الفيرس الحقلى موضعى فى التنفس
اما حقن الميت دموى يعنى بعيد كل البعد عن مرمى الفيرس الحقلى
احنا بنحقنة فى الامهات علشان تورث مناعة للكتكوت وعلشان بيعطى مناعة تتراوح من 80 الى 90 يوم
اما فى التسمين فلازم التحصين يغطى مناعة الجسم التنفسية الموضعية
فانا اعتقد ان لا يجدى فى التسمين
لكن ممكن اقول عدة تجارب من وجة نظر اخرى
ان حقن ميت اى بى فى التسمين فى الدورات الطويلة زى الساسو او البلدى بيخفف من العدوى مش بيمنعها فقط بيخفف لان الدورة طويلة
وفية وقت نستفيد من مدة مناعة التحصين الممتدة
بس حتى فى الساسو او الدورات الطويلة لا تغنى عن الرش او التقطير للحى علشان المناعة الموضعية
وان حتى لو تصادف ان عترة اللقاح الميت هى نفسها الموجودة فى الحقل وانت اكتفيت بالميت فقط فلازم يحصل اصابة فيروسية موضعية هتعمل معاك تحبنات وانسدادات فى المجارى التنفسية فى حالة اشتراكها مع الكولاى وهترفع النافق حتى وانت حاقن ميت وحتى والعترة متوافقة مع الحقلية
لكن انا ارى ان الميزة الوحيدة الموجودة فى اللقاح الميت
هو احتواءة على عترتين كلاسيك وفارينت (مغايرة )
فى حين ان مصر منعت المغايرة الحى
الكلام دا عكس النيوكاسل
اللى لازم حقن ميت علشان يعطى مناعة مدوية وتحصين حى علشان يعطى مناعة خلوية موضعية
طبعا انا مش بنصح ببرنامج معين لانها تختلف من بلد ومن منطقة لاخرى لكن حبيت فقط اوضح وجة نظرى الشخصية فى حقن الميت اى بى فى التسمين
واللى بيحقن ميت وناحج معاة يتفضل يقول تجربتة
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
-----------------------------------
كما وعدنا الاخوة العراقيين
العترات من الIB المنتشرة فى بلدنا التانى العراق
على حسب تقرير اعدة احد المختبرات فى المملكة بالاستناد الى عينات وصلت للمختبر دا فى المنطقة الغربية ومختبر اخر شهير فى منطقة الرياض
وتقريبا عدد العينات 63 عينة
48 فى معمل الغربية
والباقى فى معمل الرياض
تبين انتشار العترات الاتية
اولهم واكثرهم انتشار العترة الاسرائيلى IS/1494
يليها فى عدد العينات الايجابية 793/B ودى موجودة فى تحصينة انترفيت 4/91
وموجود ايضا
العترة الكلوية الQX ودى فايزر عاملة منها تحصينة بنفس المسمى
كمان يوجد عترة صينية
انا اول مرة اسمع عنها اسمها DY12
الصينية دى سالت عليها ناس مختصين كتير لكن واضح ان مفيش معلومات كافية عنها
فارسلت ايميل لناس مختصين ولما يجيلى الرد هنقولة هنا
وتواجد العترات الكلاسيك كان قليل فى العينات
اللى هو زى ( H120 - MA5 - M41 )
دا اللى فى تقارير المعملين
اما ما جائنى بالتلفون من معلومات (( مش واثق منها قوى بس نقولها من باب الشمولية ))
وحود عترة CR88121 ودى موجودة فى تحصينة ماريال
هذا والله اعلى واعلم
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
------------------------------------------------------------
من المعروف عن مرض الاى بى ان لو العترة اللى ماشية فى المنطقة
متوافقة مع عترة اللقاح فيعتبر البرنامج ناجح وهيصد العدوى بفضل الله
طيب كتير من المناطق متعرفش النوع اللى ماشى عندها اية
احنا هنا هنقول بعض الملاظحات التشريحية اللى بتميز بعض عترات الاى بى اللى قابلناها كتير خلال السنوات القليلة الماضية
عترات الماس كلها
بتظهر فى القصبة الهوائية يزيادة ولازم لازم لازم تسد التفريعة بتاعة القصيبات
لاكن تواجدها فى الكلى اقل
يعنى وسط كل 10 طيور متشرحة هتلاقى 9 مسدودة التفريعة و4 مثلا كلية مصابة
لانها عترة تنفسية من الاساس
ودا بنحصنلها
H120
H52
Ma5
العترة الكلوية ودى زى ما هو معرف من اسمها بتتركز اكثر فى الكلى
يعنى كل الفراخ المتشرخة كليتها مصابة
واسهالها الابيض لاصق فى فتحة المجمع
و5 او 6 من العشرة المتشرحة هتلاقى التفريعة مسدودة وحتى سدة التفريعة دى متدرجة من سدة تامة الى نص سدة يعنى بدرجات
ودى العترة بتاعتها اسمها QX
وجدنا اصابة فى احدى شركات الامهات بعترة 4/91
فى قطيع بياض واخر امهات
وكان اشهر ما يميزة طبعا بعد الاصابات المبيضية المشهورة واللى قلناها فى بوست سابق
موجود اكياس مائية تترواح حجمها من حبة الفول الى كيس ممكن يوزن نص لتر
فعلا نص لتر حقيقى فى طير غلبان مليان مية فى التجويف البطنى ودا شفناها بعيوننا
طبعا كل اللى فات دا بجانب باقى الاعراض المعروفة لدى الجميع
ودا اللى انا متذكرة فى الوقت الراهن
مع تحياتى وشكرا
مهندس عاطف عبد الدايم
منقول
المصدر
مواضيع قد تفيدك للمهندس / عاطف عبد الدايم
"مهندس عاطف عبد الدايم التطهير"
"مهندس عاطف عبد الدايم علاج الاي بي"
"مهندس عاطف عبد الدايم اعشاب"
"مهندس عاطف عبد الدايم اعلاف"
"مهندس عاطف عبد الدايم ذرة"
"مهندس عاطف عبد الدايم الاضاءة"
"مهندس عاطف عبد الدايم تطهير"
"مهندس عاطف عبد الدايم معلومات وخبرات حقلية فى مجال الدواجن"
"المهندس عاطف عبد الدايم تنظيف المزرعة"
"منتدى المهندس عاطف عبد الدايم تطهير المزرعة"
"بوستات المهندس عاطف عبد الدايم"
"تجارب المهندس عاطف عبد الدايم الحقلية"
مواضيع قد تفيدك للمهندس / عاطف عبد الدايم
- مهندس عاطف عبد الدايم وفوائد تحميض المياة لتسمين الدواجن
- مهندس عاطف عبد الدايم ومقاومة الفيروسات بالاعشاب-امراض الدواجن
- جميع برامج الاضاءة لطيور التسمين-مهندس عاطف عبد الدايم
- برنامج تطهير وتعقيم لمزرعة موبؤءة - مهندس عاطف عبد الدايم
- العوامل الطبيعية والغير طبيعية التى تؤدى الى زيادة استهلاك الطيور لمياة الشرب
- علاقة الميكوبلازما ب فيرس النيوكاسل وفيرس ال IB
- عاطف عبد الدايم يكتب -ارفض دفعة الكتاكيت فورا اذا وجدت بها هذا المرض
- سلسلة نصائح للمربى المبتدأ في مجال تربية الدواجن/م.عاطف
"مهندس عاطف عبد الدايم علاج الاي بي"
"مهندس عاطف عبد الدايم اعشاب"
"مهندس عاطف عبد الدايم اعلاف"
"مهندس عاطف عبد الدايم ذرة"
"مهندس عاطف عبد الدايم الاضاءة"
"مهندس عاطف عبد الدايم تطهير"
"مهندس عاطف عبد الدايم معلومات وخبرات حقلية فى مجال الدواجن"
"المهندس عاطف عبد الدايم تنظيف المزرعة"
"منتدى المهندس عاطف عبد الدايم تطهير المزرعة"
"بوستات المهندس عاطف عبد الدايم"
"تجارب المهندس عاطف عبد الدايم الحقلية"
تعليقات
إرسال تعليق
يرجى الاشتراك في المدونة لكي تسطتيع اضافة تعليق ونشكركم جدا على حسن المتابعة : فريق عمل كوكب الصين