خطة الامان في تربية كتاكيت السمان حصري على كوكب الصين

القائمة الرئيسية

الصفحات

خطة الامان في تربية كتاكيت السمان حصري على كوكب الصين


                                                     
خطة الامان في تربية كتاكيت السمان



خاص بكوكب الصين

خطة الامان في تربية كتاكيت السمان

بسم الله الرحمن الرحيم 
والصلاة والسلام على اشرف المرسلين سيدنا محمد صل الله عليه وسلم 
واما بعد ..
طبعا قبل اي شيء لازم يكون عندنا يقين ان تربية الارواح بيكون بأمر الله عز وجل  وبتوفيق من ربنا قبل اي شيء اخر ولكن مش معني كدة اننا 
اننا نترك هذة الارواح بدون اهتمام او رعاية ونكتفي بوضع الاكل والشراب فقط 
اي مشروع سواء مشروع كبير او صغير لابد من وضع خطة عمل وبالاخص لو كان المشروع هذا قائم على تربية كتاكيت من عمر يوم الى عمر النضوج والذبيح
بالنسبة للناس المبتدئة في تربية السمان اكبر مشكلة بتقابلهم في التربية هي اول اسبوع من استقبال الكتاكيت 
لان كتكوت السمان في عمر يوم بيحتاج رعاية خاصة لعدة ايام تسمى فترة الحضان 

طيب ايه الطريقة الصحيحة او الخطة الصحيحة التي نضعها في فترة الحضان 

1- المكان
ــــــــــــــــــــ
المكان له دور كبير جدا ويعتبر متوقف عليه نص نجاح المشروع او فشل المشروع 
انت لو نظرت لاي طفل بيتولد وبيكون عنده نقص في التكوين الجسماني فبيتم وضعة في حضانة مجهزة بكل وسائل التغذية وحرارة ثابتة 
يبقى احنا هنتعامل مع كتاكيت السمان على انهم اطفال غير كاملة النمو  او الاعتماد على النفس 
والمكان بتاعنا هيكون زي الحضانة بتاعة الاطفال 
بمعني اننا هنجهزة مساحة كافية لعدد الكتاكيت اللي هنستقبلها 
وبالنسبة لكتاكيت السمان اثناء الحضان  فكل متر مربع يكفي ل 100 سمانة اول ثلاث ايام 
هنجهز الارضية بفرش نشارة الخشب المتوسطة يعني ليست ناعمة او خشنة جدا ونخلط عليها اثناء فرشها كمية بسيطة من الجير المطفي او بودرة البلاط 
ارتفاع الفرشة على الارض اثناء الحضان متكنش عالية يعني مجرد 2 الى 3 سم فقط 
طيب اية فايدة بودرة البلاط او الجير المطفي مع الفرشة؟
بودرة البلاط والجير المطفي كافيتامينات فهو كالسيوم مفيد للكتاكيت لتكوين العظام ومعالجة الهشاشة والعظم الضعيف في هذة الفترة 
واية تاني؟
بودرة البلاط بتمتص الامونيا والغازات الناتجة في المكان من فضلات الكتاكيت 
بتمتص السوائل المسكوبة على الفرشة لان السوائل دي ممكن تتسبب في ارتفاح درجة رطوبة  الفرشة وده بيساعد على تكوين الحشرات والبكتيريا اللي احنا في غنى عنها..
2- السقايات
ــــــــــــــــــ

السقاية في فترة الحضان لو انت مبتدأ يبقى الافضل انك تستخدم اصغر سقايات ولو قدرت توفر سقايات ربع لتر هيكون افضل 
لان السقاية كل ما حجمها كان صغير فحضرتك هتتفادى ان الكتاكيت تفطس فيها ومشكلة كتاكيت السمان في فترة الحضان انها بتقف فوق بعضها على السقايةوده هتسبب في وجود نافق كتير عندك


وعيب السقاية الصغيرة الوحيد 
هو انك هتغير الماية اكتر من مرة في اليوم لصغر حجم السقاية بس طبعا لو هنوفر في عدد النافق يبقى مش مشكلة
اما بالنسبة لو حضرتك خبير فعادي جدا تستخدم سقايات كبيرة مع وضع خرطوم فيها او قطع من الظلط الصغير  والنضيف بعد غسلة
عشان تتفادي وقوع الكتاكيت بها 

طريقة السقية 
،،،،،،،،،،،،
كل لتر ماية في السقاية هنخلط عليه في فترة الحضان اما باكوا من محلول معالجة الجفاف او معلقتين عسل اسود 
المتوفر منهم كويس لان الاتنين بيمدوا الكتاكيت بنفس العناصر الغذائية في فترة الحضان ولو اني افضل لو في الشتاء يكون العسل الاسود 
والصيف نستخدم محلول معالجة الجفاف 
لان العسل الاسود برغم انه غني بالعناصر الغذائية 
لكن بيرفع درجة حرارة الجسم وبيرفع من السعرات الحرارية فطبعا في الشتا عيكون افضل

3- العلف
ـــــــــــــــــــــ
العلف لابد انه يكون علف ناعم عشان يساعد الكتاكيت على هضمة بسرعة ولابد ايضا انه يكون غني بالبروتين واقل نسبة بروتين في العلف لابد ان تكون فوق ال 23 % او اعلى
طيب ولنفرض اننا مش متاح قدامنا غير علف 21 او اقل يبقى نعوض نسبة البروتين بإضافة الفول الصويا الناعم بمقدر كل 10 كيلوا علف عليهم كيلوا فول صويا 


4- التدفئة
ـــــــــــــــــ
درجة حرارة المكان عامل مهم جدا جدا وحط تحتها مليون خط 
اول ثلاث ايام في الحضان لابد ان تكون درجة الحرارة لا تقل عن 36 درجة ولا تزيد عن 38 درجة وطبعا لو قمت بتثبيتها على 37 هيكون افضل لانها الدرجة المطلوبة 
طيب ازاي نعرف ان درجة الحرارة في المكان زايدة او ناقصة ؟؟ وازاي نتأكد انها مناسبة للكتاكيت لو مش متاح جهاز للقياس
سبحان الله كتاكيت السمان لها رد فعل سريع لتقلبات الحرارة سواء منخفضة او مرتفعة 
لو لاحظت ان الكتاكيت بتجري تقف بعيد عن مراكز التدفئة  وتذهب بجوار الحوائط يبقى ده نتيجة ارتفاح درجة الحرارة وهي بتحاول تقرب من الحوائط عشان الحيطان بتكون باردة 
لو لاحظت ان الكتاكيت بتجري كلها في ناحية واحدة وتعمل شكل هرم يبقى كدة درجة الحرارة منخفضة وبيحاولوا يلتصقوا ببعض من اجل التدفئة
لو اتجمعوا فوق بعضهم قريب من الدفاية يبقى كدة التدفئة عندك ضعيفة ولا تحوي المكان كلة 
كل الامور دي ممكن تتسبب في زيادة عدد النافق عندك اثناء الحضان 

5- التهوية
ــــــــــــــ
في ناس كتير اثناء فترة الحضان بيقفلوا كل مداخل ومخارج المكان وللاسف الاسلوب ده بيتسبب في ضرر كبير جدا للكتاكيت وتعرضهم للاحتباس الحرارية
واحد هيقولي طيب مهو احنا بنرفع درجة الحرارة ولو فتحنا فتحات تهوية درجة الحرارة هتنزل وبكدة يبقى معملناش حاجة 
بردو انت لو قفلت كل فتحات التهوية ومع ارتفاح الحرارة هيتم حرق الاكسجين في المكان بسرعة وهيرتفع ثاني اكسيد الكربون وده هيساعد اكتر غاز الامونيا الضار على الانتشار 
اللي هيتسبب في حدوث امراض تنفسية للكتاكيت وهيزيد النافق عندك 
لكن لو قدرنا ننفذ المعادلة الصعبة اثناء فترة الحضان هنحصل على حرارة عالية وهواء ساخن  ومحمل بالاكسجين المتجدد
وده بنعملة عن طريق فتحات تهوية بزاوية 45 درجة وبنجعل من خلالها فتحة التهوية وجهتها للسقف بحيث ان الهواء البارد اثناء دخولة المكان يصعد للثقف ويمتص درجة الحرارة 
واثناء فترة نزولة وانتشارة سوف يتعادل بدرجة حرارة المكان 


عكس ما يكون الهواء داخل مباشر بشكل مستوي او مائل للاسفل وهذا سوف يتسبب في الضرر

6- النظافة
ـــــــــــــــ
النظافة عامل مهم جدا اثناء فترة الحضان والنظافة المستمرة ممكن تجعلك تنتصر على اكثر من 75% من الامراض اللي ممكن تصيب الكتاكيت
فلابد من تقليب الفرشة من يوم لاخر وتغييرها عندما تبتل بالماء او على الاقل كل اسبوع يتم تجديد الفرشة 
كتكوت السمان عند خروجة من البيضة يكون  محمل بكيس المُح وهذا الكيس هو المسئول عن مناعة الكتكوت الوراثية من الاهالي
كيس المُح هذا يظل في الكتكوت من عمر يوم الى اسبوع او 10 ايام 
عند تكوين الجهاز المناعي الخاص بالكتكوت فيستغني عن هذا الكيس وعند فتحة ينزل مع براز الكتكوت على الفرشة 
فلهذا يجب تغيير الفرشة بعد اسبوع للتخلص من بقايا اكياس المُح في البراز والتي يتسبب وجودها في انتشار الامراض بين الكتاكيت

7- النشاط 


نشاط الكتاكيت هام جدا جدا لسرعة هضم الطعام بعد كل وجبة ولهذا بعد كل وجبة تعليف يجب القيام بتحريك الكتاكيت في المكان 
فالكسل والخمول بؤخر التحويل الجسماني فلا تعطي الفرصة لحدوث هذا 
فكلما تحرك الكتكوت بصورة مستمرة ارتفعت درجة حرارة جسمة وزادت سرعتة في الهضم مما يجعلة يعود لللاكل مرة اخرى ويحدث له التحويل السريع

8-الاضاءة 
ــــــــــــــــــــ
من الافضل اثناء فترة الحضان ترك الاضاءة بصورة مستمرة اول اسبوع ويتم الاطفاء بعد عمر اسبوع ساعتين بعد المغرب وساعتين بعد منتصف الليل 

وفي نهاية حديثي اتمني اني اكون ساعدت ولو بمعلومة واحدة فقط قد تساهم في نجاحك ونجاح المشروع 
واي تعليق او سؤال اتمنى وضعة تحت المقال للرد عليه 
والسلام عليكم ورحمة الله وبركاتة 
احمد رمضان
ابو جومانة



هل اعجبك الموضوع :

تعليقات

-->