احذر ايها المربي فهناك ادوية وعناصر طبيعية تتفاعل مع بعضها اعرف ما هي.
طبعا فية ادوية بتتفاعل مع بعض خارج الجسم وادوية لها تاثير او تفاعل داخل الجسم
هناخد بحث علمى بولاندى معمول فى قسم الفارما والسموم عندهم
البحث عن علاقة الانروفلوكساسين ب الدوكسى
انا مش عاوز اطول معاهم فى تفاصيل البحث لاننا عاوزين نروح لمصادر علمية اخرى علشان نغطى الموضوع دا كلة
المهم
البحث بيقول ان الانرو حتى لو بكمية بسيطة بياخر خروج الدوكسى من الجسم
وبيزود تركيزة فى بعض الاعضاء
يعنى حضرتك لو استقبلت على انرو واعطيت دوكسى بعدها بفترة الدوكسى تاثيرة بيمتد فترة اطول داخل الجسم
طيب دى لها ميزة ولها عيب
الميزة شغل اكثر ومدة اطول للدوكسى
العيب انها بتغير فترة سحب الدوا من الجسم
يعنى لو حضرتك حاطط فى اعتبارك ان الدوكسى يخرج من الجسم بعد 5 ايام
فلازم مش اعالج بية قبل البيع ب 5 ايام
فى حالة ان حضرتك اشتغلت بانروفلوكساسين المدة دى بتمتد شوية
تصل الى 8 ايام
ودا مهم للاخوة اللى شغالين فى السعودية وبيسلمو فراخم لشركات بتحلل اللحم من الادوية
طيب عاوزين نفهم اية اللى عملو الانروفلوكساسين واثر كدا على فارما الدوكسى
؟؟؟؟؟؟؟؟؟؟؟؟
كل ما فى الموضوع ان الانرو عمل تثبيط لانزيم فى الكبد اسمة
سيتوكروم P450 الانزيم دا هو المسؤال عن تكسير واخراج بعض الادوية ومنهم الدوكسى
طبعا اللى يسرى على الانروفلوكساسين يسرى على السيبروفلوكساسين فى تاثيرة على الانزيم دا
ركز فى اسم الانزيم دا لانة طلعة بلوى كبيرة هنعرفة بعدين
تعالى نسيب البحث دا ونشوف مكان تانى هل موافق على نفس الكلام ام لا
هنلاقى بحث تانى مصدرة كلية الزراعة قسم البيطرى والسموم فى الصين
عنوان البحث على تاثير عيلة الفلوروكينولونز على الانزيم دا
طبعا الصينين بيقولو ان كل العيلة لها تاثير سواء الانرو او السيبرو او النورفلوكاسين
فقط الsarafloxacin, مش بياثر على الانزيم دا
طيب يعنى معنى كدا ان الادوية السابقة بطول مفعول الدوكسى فى الجسم وبتاخر اخراجة وبتزود فترة السحب بتاعتة من الجسم
كدا خلصنا بحثين لهم نفس الكلام
طيب
اية قصة الانزيم اللى بيكسر الادوية فى الكبد دا اللى اسمة سيتوكروم P450
لما قرانا عنة فى كتاب فارماكوبيا اوربى
لقيناة موجود فى الانسان والدواجن
بس خلينا فى الدواجن
الانزيم الكبدى دا وجودة او كميتة فى الكبد متوقفة على العمر
وللما رحنا نشوف شركة روس قايلة اية علية لقينا انهم عاملين تحليل لكل انزيمات الكبد وهو بيعملو تهجين لسلالة Ross 708
وبيقولو ان اعلى تركيز للانزيم دا بيكون عمر يوم
وبيقل بعد كدا
وبيكون عمر اسبوع ضعف كميتة عمر 28 يوم
طيب لية احنا مهتمين بالانزيم الكبدى دا
وبنبحث فى اكثر من مصدر على شغلة
؟؟؟؟؟؟
لانة طلع اهم انزيم فى زيادة الاصابة بالسموم
يا راجل
طيب ازاى؟
هنا فتحنا مجلة اسمها الجمعية الامريكية للتغذية American Society for Nutrition نبحث عن دور الانزيم دا وعلاقتة بالسموم وخاصة الافلاتوكسين اللى هو AFB1
لقينا الامريكان بيقولو ان الانزيم الكبدى دا بيحول الافلاتوكسين من صورة AFB1
الى صورة اشد سمية اسمها (AFBO)
يعنى طلع انزيم لة فوايد وعيوب
عيوبة انة لما يكون عالى فى الكبد بيزيد شراسة السموم الفطرية وخاصة الافلاتوكسين
ومميزاتة انة بيعتبر اخر مرحلة لتكسير او تمثيل الادوية فى الكبد
طيب هل فية كلام تانى من بحث اخر لة علاقة بالانزيم دا
ايوة فية
بحث اخر اوربى بيقول ان مضاد الكوكسيديا الشهير الدايكلازوريل بردة بيثبط من عمل الانزيم دا
علشان كدا وجود الدوا فى فى العلف او فى المية بيزيد من فاعلية التيلوزين والدوكسى حتى لو اتخلطو معا
يعنى لو حاطط تيلوزين ودوكسى مع بعض والعلف فية الدايكلازوريل او حتى ضايفهم معاة
بيزيد فاعليتهم
طيب نرجع لموضوع الانرو او عيلتها كلها زى ما قال الصينين
هنلاقيهم بيقولو فى بحث اخر ان بسبب تاثير الانرو والسيبرو النورو على الانزيم الكبدى سيتوكروم P450 والعلف فية مضادات الكوكسيديا وخاصة الايونوفور بتعمل سمية للايونوفورات دى
وخير مثال منهم المونانسين
طيب دا الانزيم دا طلع بلوة
مفيش حاجة تهدى منة شوية علشان الادوية تتكسر وتخرج من الجسم زى ما اتعودنا
؟؟؟؟؟؟؟؟؟؟؟
فية
اول الحلول بحث صينى منشور فى مجلة امريكية بيقول ان السيلينيوم بيهدى من الانزيم دا شوية بالتالى بينصحو بان اى ادوية تعالج السموم لازم يكون فيها فيتامين هـ او سيلينيوم وخاصة السيلينيوم
لانة بيهبط عمل الانزيم دا ف مش بيحول الافلاتوكسين الى صورة اكثر سمية
طيب هل الاعشاب لها دور فى الموضوع
؟؟؟؟؟؟؟؟؟؟؟؟؟؟؟
بصراحة دورها كبير جدا جدا
بس البوست هيطول كدا وانا عارف انهم زهقتو
على العموم باختصار
الكركم اكثر معالج لموضوع الانزيم الكبدى دا
يعنى العلماء وجدو ان الكركم بيعالج سموم الافلاتوكسين بسبب تاثير على الانزيم الكبدى دا
كمان لو بتعالج باى من عائلة الفلوروكينولونز وخايف من فترة سحب الدوكسى او التيلوزين وعاوز تخرجهم من الجسم بسرعة
فخليط من الكركم مع السيلينيوم يعيد لانزيمات الكبد اتزانها
طيب نلطع بشوية ملاحظات
خلاصة ال5 ابحاث دى
اولا العلاج ب الانرو وعائلتة بيزود فاعلية الدوكسى وبردة بياخر من خروجة من الجسم بمدة 3 ايام زيادة يعنى بيخرج بعد 8 ايام بدل من 5
ثانيا االدايكلازوريل لة نفس التاثير على الدوكسى وعلى التيلوزين
ثالثا فية انزيم فى الكبد بزود السموم وبيجعلها اكثر شراسة
رابعا حل الانزيم دا هو الكركم والسيلينيوم
خامسا فى العمر الصغير الانزيم دا بيكون عالى الى عمر اسبوع بعد كدا بيقل
المصادر 5 ابحاث علمية من مختلف الدول
مع كتاب يوربيان فارماكولوجى
انا هلحق خلاصة احد الابحاث دى بالبوست تحت
انا اسف جدا على الاطالة بس حبيب الم بالموضوع من كل الجوانب
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم
شاهد ايضا
تعليقات
إرسال تعليق
يرجى الاشتراك في المدونة لكي تسطتيع اضافة تعليق ونشكركم جدا على حسن المتابعة : فريق عمل كوكب الصين